Madrugadores CODI Valga
Unha semana chea de creatividade no Plan Madruga de Valga!
Esta semana, no Plan Madruga de Valga, deixamos voar a imaxinación coa elaboración de dúas divertidas manualidades que nos permitiron explorar a nosa creatividade e gozar de actividades relacionadas co outono e co Samaín.
A primeira proposta estivo inspirada na paisaxe outonal. As nenas e os nenos decoraron unha landra mediante a técnica do collage, enchendo a súa silueta con anacos de papel de diferentes cores propias desta estación. Así, crearon composicións cheas de cor e deron a benvida ao outono dun xeito moi artístico.
Na segunda actividade, cada crianza creou o seu propio monstro terrorífico. Para iso, estampamos as mans sobre o papel e, a partir das pegadas, engadimos ollos, bocas arrepíantes e outros detalles para darlles vida a personaxes do máis orixinais e divertidos.
Deste xeito, combinamos creatividade, expresión artística e diversión, compartindo momentos especiais e preparando o ambiente para a chegada do Samaín.
Plan Madruga de Valga: unha semana chea de xogos, música e aprendizaxes
Esta semana, no Plan Madruga de Valga, as crianzas desfrutaron de diferentes propostas lúdicas que lles permitiron compartir momentos de diversión, desenvolver a súa creatividade e seguir aprendendo en compañía.
Os xogos de construción tiveron un papel protagonista, xa que as nenas e os nenos deron renda solta á súa imaxinación creando diferentes cidades. Ademais, tamén tiveron a oportunidade de xogar cos coches que o noso compañeiro Pablo trouxo para ensinarnos, espertando a curiosidade e o interese das crianzas.
A música tamén nos acompañou ao longo destes días, enchendo o noso espazo de alegría, cancións e movemento. As crianzas cantaron e bailaron ao ritmo da música, compartindo momentos de diversión e expresión corporal.
Por outra banda, tamén houbo tempo para fortalecer a mente a través do noso xogo magnético de escritura. Con el, as nenas e os nenos practicaron a escritura dos seus propios nomes e dos das súas compañeiras e compañeiros, estimulando a memoria, a atención e o recoñecemento das letras dun xeito lúdico e entretido.
Finalmente, algunhas das crianzas máis maiores aproveitaron este tempo e espazo para avanzar nas súas tarefas escolares, compaxinando así o lecer coas súas responsabilidades académicas.
En definitiva, outra semana na que o Plan Madruga de Valga se converteu nun espazo de convivencia, aprendizaxe e diversión, onde cada crianza puido gozar das actividades ao seu ritmo e compartir experiencias co grupo.
O Plan Madruga de Valga dá a benvida ao novo curso 2026-2027
O Plan Madruga de Valga iniciou o novo curso escolar o pasado 9 de setembro, ofrecendo ás familias que precisan deste servizo un espazo de atención e acompañamento desde as 7:30 ata as 9:30 horas, antes do comezo da xornada escolar.
Durante este tempo, as crianzas teñen a oportunidade de desfrutar dun almorzo, para aquelas que así o desexen, e participar en diferentes propostas lúdicas e educativas, como xogos, manualidades e actividades creativas, nun ambiente seguro, agradable e adaptado ás súas necesidades.
O mes de setembro estivo especialmente marcado pola volta á rutina e a adaptación ao novo curso. Aínda que moitas das caras xa eran coñecidas do curso anterior, tamén tivemos a alegría de dar a benvida a novas incorporacións que pasan a formar parte do grupo.
Por este motivo, durante as primeiras semanas puxemos o foco en coñecernos, crear vínculos e fortalecer a cohesión grupal, a través de diferentes xogos de presentación e dinámicas pensadas para favorecer a participación e a integración de todas as crianzas.
A creatividade tamén tivo o seu espazo neste inicio de curso, con propostas como o debuxo libre e a creación de diferentes figuras con plastilina, actividades que permitiron ás crianzas experimentar, imaxinar e expresar as súas ideas dun xeito divertido.
Pouco a pouco, fomos recuperando os ritmos e as rutinas do día a día e, unha vez xa adaptadas e adaptados ao novo curso, estamos preparados para seguir compartindo mañás cheas de xogos, creatividade, aprendizaxe e diversión no Plan Madruga de Valga.
